Ruedi Bieri | Ruedi Bieri

Ich bi der Ruedi Bieri, bi z’Äntlibuech ufem Burehof Schluchen vor…….em…mängem Jahr uf d’Wäut cho und bi det mit mine vier Gschwüsterte glücklech ufgwachse. Scho aus Bueb hani gärn Musig gmacht und bi de ou scho gli i Musigunderricht gange und ha glehrt Trumpetä spielä. Der liebscht hani aber damaus immer scho gärn im Stägreif gschpöut und eigeni Melodie erfundä.

Bis 28gi hani de i der Musiggsöuschaft Äntlibuech trumpetlät, aber scho mit 25gi bini Mitgründer vom Joduklub Fischterwaud gsi. Mit miner Frou Lisbeth hani scho aus 20jährige im Usgang und öpe be üsne Chuchifäschtli’s gsunge, mängisch bis früe i Morge. Das het üs für üses ganze Läbe zäme gschweiset. Üsi zwe Töchtere hei üsi Liedeschaft natürli ou mitübercho und hei ou sehr äs fins Musigghör i d’Wiegä gleit übercho.

D’Lisbeth und ich si öpe a 30 Jodufäscht im Duett ufträte und hei jedesmau äs sehr guet übercho.

Jetz überlöi mer d’Bühni a de Jodufäscht de Jüngere und göi gärn ga zuelose. Üs ghört mer de immer öpe no bem gmüetliche Töu i der Kafistube singe.

35 Jahr beni Vorjodler und 8 Jahr dervo Dirigänt im Joduklub Fischterwaud gsie. Näbe mier het ou d’Lisbeth 20 Jahr vorgjodlet. Jetzt töi mer üs vorauem üser Verwandschafts-Gruppe BieriFroue plus widme. Mier hei scho vöu schöni Uftritt gha mitenand und hei ou einegi schöni Projekt vor üs.

Öpedie göi mer ou im Duett und Terzett zäme mit em Ruedi Ränggli ga ufträtte.

Ich ha öpe vor über 30 Jahre mit de Nachwuchsförderig agfange, zerscht mit de Jodufamili Bieri, wo de später z’Chinderchörli Fischterwaud, z’hütige Gugelchörli drus entstande isch. Veli vo au denä Jugentliche si erfreulicherwies hüt bereits scho i Joduchör derbi.

Ganz ä hufe Uftritt ha ni mit em Joduquartett Schimbrigjodler gha. Mier hei vöu überlifereti Liedli und ou Lumpeliedli gsunge, derzue ou Kompositione vo mier.

Nach de Schimbrigjodler hani ou mit em Doppuduett Fischterwaud, mit de Sonja und em Jules Ränggli und de Lisbeth, Uftritt um die ganzi Schwiiz gha. Mit denä aune Formatione woni ha dörfe leitä und immer no leitä si mini Kompositione überau bekannt worde.

Ja, das wärs öpe so über mich.

Em ja, ich wirdä vöu gfrägt wieso dasi töig komponierä, das isch eigetlich chli usere Notsituation use passiert, ich ha immer öpe nach Lieder gsuecht woni niene gfunde ha.